Autras infurmaziuns

Scopo da la statistica da furmaziun
La retschertga da datas dal sectur da scola serva en emprima lingia a metter a disposiziun a la confederaziun ed als chantuns ina basa da planisaziun e da decisiun en dumondas da la politica da furmaziun.
 Ultra da quai èn ulteriuras instanzas dependentas da datas da scola ch'èn vegnidas elavuradas correspundentamain: posts da l'administraziun e da la planisaziun, direcziuns da scola, autoritads da scola, cussegliaziuns professiunalas e da studi, organisaziuns da magistras e da magisters, federaziuns professiunalas, posts da perscrutaziun e da documentaziun. En in senn pli vast ston ils resultats statistics da tut il sectur da furmaziun vegnir mess a disposiziun er a la scienza, a l'economia privata, als partenaris socials ed a la publicitad (geniturs, votantas e votants, pajataglias, partidas politicas).

Protecziun da datas
Las indicaziuns vegnan retschertgadas sco datas persunalas e tractadas tenor las directivas da la lescha federala davart la protecziun da datas. Per las evaluaziuns statisticas sco er per intents da la planisaziun da la furmaziun e da la statistica da scola vegnan questas datas duvradas mo en furma anonimisada.

Segirezza e fidaivladad
Datas persunalas davart persunas en scolaziun e davart il persunal da scola èn datas sensiblas. Tar la retschertga vegn ina transmissiun segira da las datas garantida tras quai che las datas vegnan codadas. Las datas d'access sco er tut las autras datas transmessas vegnan codadas tenor il stadi tecnic il pli nov. La protecziun sa basa sin quels mecanissems ch'èn er enconuschents per applicaziuns dad e-banking e d'auters secturs, nua che la protecziun da datas e la segirezza giogan ina rolla fitg impurtanta.
Sche Vus lavurais en SSF, vesais Vus, sche Vus As chattais en in sectur segir: la lingia d'adressa dal browser è marcada correspundentamain (p.ex. cun colur u cun in marschlos). Per persunas che s'interessan per dumondas tecnicas: Nus lavurain cun certificats da server EV-SSL. Ils certificats vegnan emess da posts da certificaziun ch'èn spezialmain renconuschids. Il certificat garantescha che nossa pagina d'internet è effectivamain vegnida redigida da nus e ch'ella gira sin noss server d'internet. Il post da certificaziun è accredità sco tal e vala pia sco fidà. Noss certificats vegnan emess da la firma QuoVadis Trustlink Svizra SA. Questa firma collavura stretgamain cun tut ils producents da browsers enconuschents (Microsoft, Mozilla, Google, Apple, Opera) e procura ch'ella vegnia identifitgada dals browsers sco post da certificaziun accredità. Sch'i dat problems cun ils certificats, ha quai per il solit da far cun il fatg ch'il post da certificaziun vegn classifitgà sco betg fidà. Qua gidi ubain d'actualisar la software dal browser ubain da classifitgar la pagina d'internet sco pagina fidada (vesair l'instrucziun dal browser). Ans annunziai en cas da dubi il problem – nus empruvain d'As gidar vinavant.

Basa legala
La basa la pli impurtanta per tut las retschertgas da la statistica da furmaziun è la lescha federala davart la statistica federala (LStat 1992).